الرئيسية » » وانا فاضي اطلع قوة علشانك انت وابنك ويطلعوا علينا شوية بلطجية | آيات جودت

وانا فاضي اطلع قوة علشانك انت وابنك ويطلعوا علينا شوية بلطجية | آيات جودت

Written By Hesham Alsabahi on الجمعة، 12 ديسمبر، 2014 | 8:30 م

كلمت واحد ابنه مخطوف، نزل يجيب حاجة من السوبر ماركت وماجاش، عملوا محضر في القسم وبس على كده، القسم قاله مش كتبنا اللي عايز تقوله؟ ماتجيش هنا تاني، الراجل كل يوم والتاني يروح القسم، يقوم الظابط ولا ماعرفش رتبته ايه يبهدله ويبهدل الفرّاش اللي بيدخّله. الظابط بيقول للراجل انه هو اللي غلطان انهم بيرموا عيالهم في الشارع وبعدين يروحوا للقسم يعيطوا لما يتخطفوا. الراجل عمّال يقولي ماهو مش حاسس باللي احنا فيه، اديت للواد 2 جنيه يجيب كاراتيه، لما عوّق رحت المحل البياع قالي انه الواد اشترى بجنيه ورجعله جنيه، قالي إن الواد كان عكاز جدته ولما اتخطف جتلها جلطة، وأم الولد كانت بترضع لبنها وقف وبقوا يشتروا لبن صناعي وممشيين المصاريف بالعافية. الحكاية اتعرفت في البلد ولقى حد بيكلمه يقوله ابنك معايا وسمّعه صوته، قاله ده مش صوت ابني، قاله خلاص هندبحه، الراجل خاف وجهز المبلغ اللي حيلته وطلع في المكان بالمكنة (الموتوسيكل)، طلعوا اللي كلموه بلطجية اشّطوه واخدوا الفلوس والمكنة والموبايل، طلع عمل محضر في القسم الظابط زعقله وقاله مانعينلك حارس خصوصي أحسن وهو اي حد يكلمك يقولك ابنك معايا تروحله؟ قاله طيب اعمل ايه مانتو مش بتدوروا ولازم اجري ورا أي خيط ابقى اديكو نمر التليفونات وتدوروا انتو وتروحوا؟، فالظابط شتمه طبعا وقاله وانا فاضي اطلع قوة علشانك انت وابنك ويطلعوا علينا شوية بلطجية!!!
المهم أنا مش عارفة اكتب الكلام ده ع الصفحة، في الحقيقة خفت اكتبه أجيب للراجل مصيبة، بس الراجل ده اتبهدل من كل النواحي، فيه ناس فاكرة ان اللي ابنه بيتخطف ده بيبقى بس ابنه اتخطف، وان مفيش حياة كاملة عمالة تقع من تحت راس البلوة دي.
آه نسيت أقولكو، صباح الخير 
التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.