الرئيسية » » حالة إنسانية | آية محمد

حالة إنسانية | آية محمد

Written By لبنان كتاب الشعر on الخميس، 26 مارس، 2015 | 5:46 م

الولد ده بشوفه بقالي اكتر من اسبوعين نايم ليل نهار على الارض قدام مدخل مترو الزهراء، النهارده سألت الناس، محدش يعرف قصته، في راجل وحيد متكفل باكله وشربه، بيقول ان الولد ظهر في المنطقة من شهر، وانه كان لابس تريننج بيت نضيف وشكله ابن ناس، لكن في ناس اخدو هدومه وادوله الجلابيه المقطعة دي.
الولد واضح انه متاخر عقليا، كلامه مش مفهوم، وواضح ان ناس كتير بتضايقه، لانه كان خايف مننا جدا في الاول لحد ما قعدت جنبه على الارض وجبتله اكل علشان اقنعه اني مش هأذيه.
عمره تقريبا 17 سنه من شكله، بيعمل حمام في هدومه، وقاعد بنفس الهدوم في نفس المكان من اكتر من اسبوعين، واعتقد انه ممكن يفضل قاعد كده لحد ما يموت لان مافيش اي حد مهتم، ولو الراجل اللي متكفل باكله حصله حاجة الله اعلم هياكل منين.
انا حاسه بالذنب اني النهارده بس فكرت اعرف حكايته، وعايزة اعرف ايه الاجراء اللي ممكن يتعمل، هل في طريقة ممكن نبلغ بيها في الاقسام يمكن اهله بيدوروا عليه؟ هل في ملجأ ممكن يتكفل بيه لو معرفناش نوصل لأهله؟ في اي حد عدى بموقف زي ده قبل كده ويعرف ممكن نعمل ايه او نسأل مين؟
...
تحديث.
النهارده الصبح لما روحت، عمال المترو كانو دلقين ميه عليه وعلى الارض علشان يمشوه، البياعين في المنطقة قالولي انهم اتخانقوا معاهم علشان يسيبوه، الولد كان مبلول وبيترعش، لما اديتله اكل بيبلع بصعوبه، اعتقد انه جاله احتقان في الزور، الولد غالبا عنده توحد مش اعاقة ذهنيه، بيعرف يشكل جمل بس مش عارف يتواصل مع الناس، لما في عدد اتلم حواليه مسك راسه وبدأ يزعق علشان يمشوا، بيجاوب على الاسئلة بهمهمه مش مفهومه، لكن عرف يعمل جمل زي " انا شبعت"، " حاسبي البطانيه"، " ايدي متعورة بصي الدم" رغم ان ايده مفهاش اي حاجة غير طين وبويه، ولما مسكت الموبايل اصوره قالي " هاتي اكلم بابا"، حاولت اديله الموبايل او اعرف منه اذا كان حافظ اي رقم، لكن للاسف معرفتش اطلع منه بمعلومه.
....
المطلوب الوصول لاكبر عدد من الجرايد والبرامج، في اكتر من برنامج تواصل معايا واخد صوره، وفي ناس من تلفزيون النهار راحت فعليا تصور.
المطلوب برضه مكان يقبل استضافته مؤقتا حتى لو بفلوس، مكان يكون فيه حد متخصص في حاالات توحد علشان يعرف بتعامل معاه.
....
الولد عيان، وهتجيله قرح في جسمه من الحمام اللي بيعمله على نفسه وقله الحموم، زائد اني خايفة حد يستغل الوضع ويحاول ياخده لاي غرض.
تحديث.
عملنا محضر في قسم مصر القديمه. والولد اتعرض على النيابه واتعمله كشف طبي مبدأي وبايت النهارده في دار الاورمان ان شاء الله، حموه ولبسوه هدوم نضيفه وعشوه وزمانه في السرير دلوقتي : )
بكره ان شاء الله ورقه يخلص في النيابه، ويتعمله كشف طبي كامل ويروح دار الاورمان في قسم ذوي الاحتياجات الخاصه.
شكرا لكل اللي ساعد ولكل اللي عرض المساعده، ويارب لو ليه اهل يعرفوا يوصلوله.

التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.